Ka dalë për të qetësuar gjakrat mes djemve dhe ka gjetur vdekjen.
Sonila Dervishi është vrarë mëngjesin e së shtunës në ambientet e jashtme të lokalit “Dream City, në zonën e njohur si Kthesa e Kamzës.
26- vjeçarja është qëlluar me dy plumba e më pas ka gjetur vdekjen në Spitalin Ushtarak. Zyrtarisht policia ka njoftuar për vrasjen e 26- vjeçares, por deri në orët e vona të darkës nuk ka pasur asnjë të dyshuar apo dhe të arrestuar për ngjarjen, megjithëse të pranishëm në lokal kanë qenë qindra veta.
Ngjarja
Sonila Dervishi, vajza që gjeti vdekjen në ambientet e lokalit të njohur të Tiranës, nuk ka qenë objekt i qitjes të autorëve të vrasjes.
26 vjeçarja ka ndërhyrë për të ndarë sherrin mes dy grupe rivale në lokal. Vajza ka mbetur viktimë e përplasjes së tyre, të cilët pasi janë konfrontuar fillimisht në lokal, kanë dalë në ambientet e jashtme për të zgjidhur sherrin me armë.
Sipas personave të pranishëm në vendngjarje, thuhet se dy grupet e të rinjve janë konfliktuar fillimisht në lokal pasi kanë ngacmuar vajzat që ndodheshin në tavolinë.
Pas sherrit që ka nisur me grushte në lokal, kanë ndërhyrë personeli i sigurisë duke i nxjerrë të dy grupet në ambientet e jashtme të lokalit.
Pas sherrit që ka degjeneruar në fjalë fyese, djemtë kanë nxjerrë armët, ku në përpjekje për të vrarë kundërshtarët, kanë qëlluar mbi Solina Dervishin, e cila ndodhej nën shoqërinë e një prej grupeve që janë përfshirë në sherr.
Po këtë version të ngjarjes ka dhënë dhe policia, megjithëse nuk ka asnjë të dyshuar apo dhe të identifikuar si autor të ngjarjes.
Personat që janë shoqëruar në Drejtorinë e Policisë së Tiranës, kryesisht personeli i lokalit, nuk kanë dhënë dëshmi të besueshme për policinë, që mund të hidhnin dritë mbi ngjarjen. Burime nga grupi i hetimit bëjnë me dije se personeli i sigurisë apo dhe kamerierët e lokalit kanë deklaruar se nuk dinë kush ishin personat që janë konfliktuar.
Mësohet se të gjithë kanë deklaruar se djemtë e përfshirë në konflikt ishin klientë, të cilët rreth orës 2 e 45 minuta kanë nisur të ziheshin me njërit-tjetrin për motive që ata nuk i dinin, e më pas janë nxjerrë jashtë nga personeli i sigurisë. Sipas dëshmisë së tyre, vajza që është vrarë ka qenë nën shoqërinë e njëri prej grupeve të konfliktuara.
Personeli i lokalit ka dëshmuar se Sonila për një kohë të caktuar ka punuar në këtë lokal si balerinë, por së fundmi vinte aty thjeshtë si kliente.
Ndërkohë rreth mesditës të afërmit e Sonilës kanë marrë nga morgu i Tiranës turpin e pajetë të 26- vjeçares. Ceremonia mortore e vajzës, e cila jetonte me gjyshen e saj, është zhvilluar në rrugën “Belul Hatimi”, në zonën e quajtur Oxhaku në Tiranë.
Sipas banorëve të lagjes, Sonila thuajse ishte e panjohur për fqinjët.
Para pak kohësh Sonila ishte e divorcuar dhe jetonte me gjyshen e saj. Fqinjët thonë se për të siguruar jetesën vajza punonte si balerinë në klubet e natës, ndërsa të afërmit e saj nuk pranojnë të flasin për TemA-n duke kërkuar që të respektojnë në heshtje dhimbjen e tyre për humbjen e jetës së 26- vjeçares, Sonila Dervishi.
DREAM CITY njofton se ka pezulluar mbrëmjen e së shtunës
Pas ngjarjes së ndodhur, në faqen zyrtare drejtuesit e lokalit kanë njoftuar se kanë pezulluar aktivitetin. Në njoftim thuhet se për të lënë organet e policisë dhe të prokurorisë për të kryer hetimet për zbardhjen e ngjarjes, mbrëmja e së shtunës nuk do të zhvillohet. Po kështu, drejtuesit e lokalit sigurojnë që në javët e ardhshme aktiviteti do të fillojë normalisht dhe se ngjarja nuk vë aspak në pikëpyetje sigurinë e lokalit.
“Sa i përket përgjegjësisë së Dream City, në këtë ngjarje të rëndë, duam t’ju sigurojmë që janë respektuar në mënyrë maksimale të gjitha rregullat dhe standardet nga stafi i sigurisë. Në mënyrë të menjëhershme, situata e krijuar brenda ambienteve është menaxhuar me profesionalizëm dhe personat në fjalë janë larguar jashtë ambienteve. Ngjarja e rëndë ka ndodhur jashtë ambienteve të Dream City, aty ku stafi i sigurisë nuk mund të ndërhyjë, pasi nuk e lejon ligji një gjë të tillë si dhe për të lënë kohën e duhur për të njoftuar organet e rendit publik për të menaxhuar këtë situatë që u përshkallëzua në mënyrë të paparashikueshme”, thuhet në faqen zyrtare në Facebook të Dream City.